Novas

NOVO INFORME de CONTROL LEITEIRO

15 / Octubre / 2015

Este informe complementa a información xa recibida polos socios nos informes mensuais, o de lactacións finalizadas e o informe técnico, analizando varios índices que poden ser útiles na xestión da explotación. O período analizado comprende dende setembro 2014 ata xullo 2015.

Describimos brevemente este informe, tratando de facilitar a interpretación dos datos. Entre paréntese indícanse os valores medios da provincia para permitir comparar os valores da explotación cos valores medios. ter en conta que o valor medio non é sempre o óptimo.

 

Saúde do rabaño

 

A análise de RCS (reconto de células somáticas) permite monitorizar a mamite no rabaño.

Un 35% das vacas chegan ao secado cun nivel elevado de RCS

A taxa de curación media no secado é do 66%. Son vacas que tendo un control ao secado elevado en RCS, teñen un 1º control no novo parto por debaixo de 200.000 células. O ideal serían taxas de curación superiores ao 75%.

A porcentaxe de novas infeccións no secado é do 19%. Son vacas que tendo un control ao secado inferior a 200.000 células, presentan un 1º control no novo parto cun RCS elevado. Asúmese que a infección foi contraída durante o periodo de secado ou durante os primeiros días de lactación. O ideal serían taxas inferiores ao 10%.

A porcentaxe de vacas de 1º parto con RCS elevado ao parto é do 18%.

Para poder facer este seguimento vaca a vaca, no informe mensual indícase nas vacas de 1º control o RCS do último control do parto anterior.

A análise das baixas nos permite ver os motivos de eliminación e cando estas se producen, permitindo focalizar o problema de eliminación involuntaria.

A porcentaxe media de baixas totais, incluindo vacas, xatas e xovencas é do 18%.

A porcentaxe de vacas dadas de baixa é do 27%. Este valor debe estar en consonancia tanto coa porcentaxe de reposición como coa porcentaxe de recría para permitir manter un equilibrio no censo da gandería.

A porcentaxe de baixas sen parto é do 5%. Esta porcentaxe so se refire a femias e está infravalorada, xa que so ten en conta os animais xa rexistrados, non considerando as baixas de xatas que morren antes de ser rexistradas.

A principal causa de eliminación é a esterilidade (vacas que non empreñan ou abortan) seguido da morte na explotación.

A media de días en leite nos que se desbotan as vacas é de 295 días. Valores inferiores indican que as vacas son eliminadas sen rematar a súa lactación, xeralmente por problemas graves que condicionan a súa permanencia no establo.