Novas

CRISE DO SECTOR

01 / Noviembre / 2021

Como reflectimos na memoria de 2020 da asociación, Galicia é unha das rexións máis produtoras de leite de Europa, sendo a produción de leite o principal motor económicos de moitos dos seus concellos, a pesar de que cada vez quedan menos ganderías estas teñen un maior tamaño, e moitas delas xa están a contar con traballadores contratados, ademais de dar emprego a moitas persoas a través dos servizos externos que precisan: veterinarios, podólogos, enxeñeiros, comerciais, albaneis, electricistas, fontaneiros, mecánicos, xestorías, control leiteiro, etc. Todo isto permite crear un rural vivo, capaz de xerar riqueza e fixar poboación fóra das cidades.

O leite é o principal produto destas ganderías, que venden ao prezo ofertado polos compradores, pois a capacidade de negociación é escasa, o número de operadores no mercado é limitado, a organización das recollidas e tratarse dun produto moi perecedoiro, que hai que vender diariamente pon aos produtores nunha situación de desvantaxe para negociar.

 Así, se observamos a evolución do prezo en Europa e España ao longo do último ano, vemos como a diferenza é cada vez maior, sendo o prezo en España inferior en agosto que en xaneiro, todo o contrario ao que ocorre con todos os produtos que precisan as ganderías para producir: gas oíl para traballar as terras, electricidade para muxir e arrefriar o leite, abonos para poder aproveitar o potencial das terras e cereais para complementar a alimentación das vacas. Todos estes produtos experimentaron un incremento do seu prezo, deixando as ganderías nunha situación moi complexa.

Esta situación provoca que os gandeiros teñan que manifestarse, na busca dalgunha solución e do cumprimento da lexislación, onde se di que un produto non pode ser vendido por un prezo inferior aos custes de produción, algo que sí está sucedendo co leite. O futuro a curto prazo non parece nada mellor, con anuncios de incrementos nos prezos de cereais e abonos para o ano 2022 e sen perspectivas de que isto se traslade ao prezo do leite.

Así, a primeira convocatoria corre a cargo de Agromuralla, asociación de gandeiros das provincias de Lugo e Coruña para o vindeiro 4 de novembro en Lugo.